«آسیانین ان یاخشی تکواندو مربی سی ایله صمیمی دانیشیق»- اوستاد فلاحی راد: مسئوللاردان راضی دئییلم
«
اوستاد حسن فلاحیراد (عکس : فرید پزشکی)
تکواندوایلا نئجه تانیش اولوب-باشلادینیز؟
«مجید هنرمند» آدلی بیر قونشوموز وارایدی. اونون اصرارلاریایله بو ورزیشی باشلادیم. دؤنه لرله منه «سنین یاخشی استعدادین وار، سنین بدنینین فورمو بو ورزیشه چوخ اویغوندور و...» دئیه رک منی تکواندویا ماراقلاندیردی. دفعهلرله آنامدان تکواندو پالتاری آلماق اوچون پول ایستهدیم آنجاق وئرمهدیلر! قیساسی، اؤز جیب خرجلیکلریمی توپلاییب پالتار آلدیم و 8-جی صینیفی (دوم راهنمایی) اوخودوغوم زامان ایلک مربیم آقای «فرهنگ اطهری»-نین کیلاسیندا آد یازدیردیم و تکواندونو باشلادیم.
جنوبی کرهنین «دونیا تکواندو قهرمانلیغی» یاریشلاریندا شاگیردلرینیزین ایکیسیده (یوسف کرمی و فرزاد عبدالهی) قیزیل میدال آلدیلار. بو حاقدا نه دوشونورسونوز؟
جنوبی کرهنین دونیا قهرمانلیق یاریشلاریندا، ایلک دفعه اولاراق ایران قهرمان اولدو. بوندان اؤنجه بو یاریشلارین بوتون دؤورلرینده کره قهرمان اولموشدو آنجاق بو دؤنه ایران 3 قیزیل میداللا بؤیوک اوغور قازاندی و قهرمان اولدو. 3 قیزیل میدالین ایکیسینی مییانالیلار قازاندی. شاگیردلریمین کرهایله برابر ایکی قیزیل میدال قازانماسیدا ماراقلیدیر.
یوسف کرمی، اوستاد حسن فلاحیراد، فرزاد عبدالهی (عکس : حسین بهادر جنابلارینین ایمئیلی ایله الیمه چاتمیش)
گلهجک المپیک یاریشلاریندان دئیین، شاگیردلرینیزدن لندن 2012 المپیکینده میدال آلاجاقلارمی؟
یقین لندن المپیکینده ایرانین بیر نمایندهسی مییانالی اولاجاق. ایندیدن المپیکده مییانالی تکواندوکارین میدال آلاجاغینا سؤز وئریرم. 2016 المپیکینه ایرانین هر ایکی نماینده سی مییانادان اولماق اوچون برنامه دوزنلهمیشم. حتی منیم 2020 المپیکینهده برنامم وار.
همشهریلر و مسئوللار سیزی نئجه قارشیلاییرلار؟ اونلاردان راضیمیسینیز؟
مییانالیلار سایقیلی و یاخشی اینساندیرلار، قدربیلندیرلر آنجاق آرالاریندا الیمی سویودانلاریدا وار اؤزللیکله بعضی مسئوللار.اوست-اوسته همشهریلردن راضییم آنجاق مسئوللاردان چوخ گیلایم وار. نمایندهلردن کی هئچ راضی دئییلم، هئچ بیریسیندن.
مییانالی تکواندوکارلارین نه موشکوللری وار؟
ان اؤنملی موشکول یئریمیزین کیچیکلیگیدیر. تمرین ائتمهیه موناسیب مکان یوخوموز. البته یئنی سالونون تیکیلمهسی قورتاریرسا بو موشکولوده حل اولونموش دوشونورم.
سیزجه ایران تکواندوکارلارین اول 5 نفری کیملردیر؟
منجه «محمد باقر معتمد» ایرانین انیاخشی تکواندوکاریدیر. آنجاق بوتون ایراندان 5 نفر سئچیرمسه اونون 3 نفری مییانالیدیر. ترتیبله دئسم محمد باقر معتمد، فرزاد عبدالهی،
فیکرینیزی چوخ مشغول ائدن مسئله نهدیر؟
ایشسیزلیگیم.ائویم یوخ، ماشینیم یوخ، حتی بیمهده دئییلم. بئله مسئلهلر فیکریمی چوخ مشغول ائدیر.
بیلدیییمیزه گؤره باشقا اؤلکهلردن سیزه یاخشی پیشنهادلار وئریلیب، نهدن یئنه مییانادا قالیبسینیز؟
بلی، نئچه اؤلکهدن منی دعوت ائدیبلر، آنجاق یوردوما باغلیلیغیم و مییانامیزین سئوگیسی بورادان چیخماغیما اجازه وئرمیر. شاگیرلریمه گؤره بورانی ترک ائده بیلمیرم.
شاگیردلرینیزدن نه اومورسونوز؟
حؤرمت، سایقی و جامعهده یاخشی داورانمالارینی اومورام. مَردم-ون الیندن توتسونلار، اونلارا کؤمک ائتسینلر. ایفتیخار یاراتدیقجا مغرورلانمالارینی یوخ آرتیق متواضع اولمالارینی ایسته ییرم. شاگیردلریمین جامعهده مثبت داورانیشلاری اولورسا منیم باش اوجالیغیما، باشقا یوللارا چکیلیب منفی داورانیرسالار منیم شرمنده چیلیگیمه سبب اولاجاقلار.
یئنی یئتمه لره گنج لره نه اؤیودونوز وار؟
ایشبیلنبؤیوکلرین سؤزلرینه باخسینلار، تجروبهلریندن فایدالانسینلار. جوانلیق کوچهده، خییاواندا وئللهنمک دئییل، گلهجهیه برنامه تؤکوب فیکرینده اولماقدیر. مسئوللارا اؤیود وئرمهیی گنجلردن واجیب بیلیرم! همشریلرین فیکرینده اولسونلار، شهره اورک یاندیرماق گرکدیر. ایشلرینی یالان وعدهلرله ایرهلی سورمهسینلر.
تانریدان نه دیله ییرسینیز؟
یئنیدن اوشاق اولماغیمی. بیرداها اوشاق اولسام، تکواندو دالیسینجا گئتمه رم! شاید بعضی حاقسیزلیقلاری بیرداها گؤرمهدیم!
سون سؤزونوز؟
سوندا تکواندو هئیت-ین رئیس یندن انتقادیمی بیلدیریرم. فنی دئییللر، گرکلی اولان تخصصلریده یوخدور. آچیقجاسینا دئییرم، مییانادا تام تکواندو قوللوغوندا اولان بیرجه شخص، منم.
دانیشیق آپاران : بهــــــــزاد زالـــــــــــی
سؤزلوک
ایلک : نخستین یاریش : مسابقه
دؤنه : دفعه اؤنملی : مهم
اوغور: موفقیت داورانماق : رفتار کردن / داورانیش : رفتار
دوزنلهمک: ترتیب دادن اؤیود : نصیحت
قارشیلاماق : برخورد کردن، استقبال کردن ایره لی سورمک : پیش بردن
اؤزللیکله : مخصوصاً دیله ک: آرزو، خواهش
اوستاد فلاحی شاگیرلرایله مشق ائدرکن (عکس : فرید پزشکی)
اوستاد فلاحی شاگیردلرایله بیرلیکده (عکس : فرید پزشکی)
بهزاد زالی : گونئی کره-نین یاریشلاری قورتاردیقدان سونرا میللی قهرمانلاریمیزین کوتله طرفیندن (دئمیرم یاخشی!) آلقیشلاندیغینی مسئوللار طرفیندنایسه (یئنه دئمیرم یاخشی!) تقدیر اولونمالارینی گؤردوک. آنجاق بو میللی قهرمانلارا اؤیرتیم وئرن، ایللر بویو عؤمرونو تکواندو اوغروندا حصرائدن «اوستاد فلاحی» آرتیق آلقیشا-تقدیره لاییق دئییللرمی؟
قیسا زامان سورهسی اوستادین شاگیردی اولما شرفینه ناییل اولدوغومدان آرتیق جسارت آلاراق قوللوقلارینا چاتیب بو اولایلارلا باغلی دانیشیق آپارماق ایستهدیم. اوستادایسه آلچاقکؤنوللوکله منیم دیلهییمی یئرینه یئتیردیلر. دانیشیقلاریمیزین قیساسین بو سیته نین سئویملی اوخوجولاریلا پایلاشماق ایستهدیم.
بیرداها ایستهکلی آرخاداشیم، سایین «فرید پزشکی» جنابلارینا چکدیگی زحمتلرینه گؤره میننتدارلیغیمی بیلدیریرم.
