اوغورسوز دولانديريجي (كلاهبردار ناكام)

 اولو تانري نين آدي ايله

كسين سيزه ده بونا بنزر اس ام اس لر گلسه اونون تام يالان و بوش سؤز اولدوغونو باشا دوشه‏جك‏سينيز.

«با عرض سلام و تبريك به شما كاربر عزيز؛ شما كاربر محترم در قرعه كشي كه به مناسبت اعياد سعيد قربان و غديرخم در موسسه مالي و اعتباري ارتباطات برگذار شد؛ برنده جايزه وجه نقد به مبلغ پانزده ميليون ريال شده ايد. لطفاً پس از دريافت اين پيام كوتاه ما تماس حاصل فرماييد؛ موسسه مالي و اعتباري ارتباطات حامي و پشتوانه سيم كارتهاي ثابت و اعتباري: (ايرانسل؛ همراه اول؛ ايرانتاليا و ايرانتل)...»

دونن آخشام بو اس ام اس منه گلديكدن سونرا اونون ساختا و يالان اولدوغونو بيله‏رك كنجكاوليق اوزوندن اونلارين نئجه حيله ايشلتديكلريني اؤيرنمك اوچون آرديني توتوب اونلارين روش لريني خولاصه اولاراق سيز ايله ده پايلاشماق ايسته ديم. احياناً چئوره نيزده آگاه اولمايان اينسانلار وارسا بئله دوزاقلارا دوشمه سين لر دئيه اونلاري بيلگيلنديرين لوطفن.

اس ام اس يوللايان ****0910948 نومره سينه زنگ آچديم. كيمسه اؤزونو موسسه مسئولو(!) آدلانديراراق «سنين موبايل نومره‏ن قرعه كشي ده برنده اولوب» دئييب بير سيرا تبريكلردن سونرا جاييزه مي حسابيما تؤكمك اوچون  مندن حساب نومره ايله مشخصاتيمي ايسته دي!

ايسته ديكلريني دئديكدن سونرا هانسي بانك-ين حسابي اولدوغونو بيلدي و او بانكين «خودپرداز دستگاه»ينين يانينا گئديب اوردان اونا زنگ آچماغيمي ايسته دي! مين جوره ضد و نقيض سؤزلرله مثلاً انتقال‏دان سونرا موجودي آليب رسيدينده اولان بير سيرا نومره لري سند اولاراق اؤزلرينده ساخلاماق اوچون بو ايشي گركلي بيليردي!

هر حالدا گئديب خود پرداز آرخاسينا چيخديم. (فقط بيلميرم منيم ميليادر اولماغيمي و حسابيمين پول ايله دولو اولماسيني هاردان بيلميشدي لر!!!) اؤنجه حساب موجوديمي باشقا كارتا انتقال وئرديم. ساده جه 40.402 ريال پول حسابيمدا قالدي!

بيرداها او موبايل نومره سينه زنگ آچيب «خودپرداز آرخاسيندايام» دئديم. كارتيمي ساليب موجودي آلماغيمي مندن ايسته دي! آلديم. موجوديمي ايكي رقم- ايكي رقم اوخوماغيمي ايسته دي!! (بوردا ايز ايتيرمه يه فيكير وئريرسينيزمي؟!!) «40-402» دئديم. (4 مين تومن حدودوندا موجوديمي دئديم).

بوراسي ماراقلي دير! «موجودينيزين آز اولدوغونا گؤره بو حسابا پول تؤكه بيلمه ريك» دئدي! بو حسابين تراكنشي آزدير! معتبر حساب دئييل و بونا بنزر بوش سؤزلر دئدي!

باشقا حساب نومره سي ايسته ييردي! آنجاق من حسابيمين آيدا ميليون لار تومن تراكنشي و اونون تام معتبر اولدوغونو آنلاتديم!! حتي آز اؤنجه موجوديمي باشقا كارتا انتقال وئرديگيمي ده دئديم. (انتقال وئرديگيم حسابين مشخصاتيني دا ايسته مكلري داها چوخ ماراقلي ايدي!)

منيم آگاه ليغيما شوبهه لنميش اولدوغونو دويدوم. آنجاق هله اومودونو الدن وئرمه ميشدي! بيرداها كارتي دستگاها سالماغيمي ايسته دي. مرحله- مرحله مني «تغيير رمز اينترنتي» گزينه سينه آپاردي! بوردا اؤزوندن بير 5 رقملي سايي دئدي. (دئمك بوردا اينترنتي رمزيمي اؤز ايسته ديگينه چئويردي) بو ايش قورتارديقدان سونرا دستگاه بير رسيد وئرير. رسيد اوزه رينده كارتين انقضا تاريخي ده يازيلير. او تاريخي مندن سوروشدو سونرا كارتين آرخاسيندا يازيلان 2VVC نومره سيني ده سوروشدو! (بوردا ايش بيتير!!)

بيلديگينيز كيمي اينترنت ايله خريد ائتمك اوچون ساده جه اينترنتي رمز، ‌كارتين انقضا تاريخي و 2VVC نومره سي گركلي دير. اونون دئديگي يوللاري گئتمك ايله اوچونو ده مندن آلميشدي.

سونوندا بو حساب بيزيم اطلاعاتميز ايله اوخومور،‌ بو حسابا پول تؤكولمور و ... دئيه رك باشقا حساب نومره سي ايسته يير!!

كلكلريني تام اؤيرنديكدن سونرا تئلفونو قاپاتديم. همن اينترنت رمزيمي ده بيرداها ده‏ييشديم و...

سئويملي آرخاداشلار!

ائشيتديگيمه گؤره ميياناميزدا دا بونا بنزر دوزاقلارا دوشوب مالي ضررلره معروض قالان شخص لر وار. يئنه بو قونودا آرتيق بيلگيسي اولان وارسا بيلگيلريني بو سيته نين كاربرلريندن ده اسيرگه مه سينلر لوطفن.